我的同學全是孤兒？
He he …… 我係817。
小闊闊今日打俾我，話比我知佢都收到聖誕老人嘅聖誕咭。
當我哋一齊返學時，見到小闊闊嘅袋裡面有好多聖誕咭，小闊闊話一張聖誕最平也要兩蚊張，而老細話十蚊可以買廿張聖誕咭，平均只係五毫子， 當然買五毫子的聖誕咭吧。
我問：「咁多聖誕咭點算呀？」
小闊闊傻笑：「唔知啊……呀，不如我哋代我哋D同學寄聖誕咭俾聖誕老人寫啦，趁聖誕老人仲喺香港嘛。」
於是我哋就夾手夾腳扮朋友嘅字跡寫信，但係總係每封都差唔多，有D擔心聖誕老人會識穿。
阿薄卻剛剛經過：「你估聖誕老人傻嘅咩？封封字體都一樣！」
小闊闊問：「咁點算呀？」
阿薄：「關我咩事？」，就轉身唔見咗。
我只好望住小闊闊，小闊闊提議返去揾埋Eros 哥哥同埋Bear姐幫手啦！ 最少多兩隻字體
彷彿神出鬼沒嘅阿薄又彈出嚟：「我有辦法，不過用唔用隨便你！」
小闊闊「哦」咗一聲，我只好都跟著「哦」咗一聲。
阿薄"得得戚戚"咁：「你哋只要寫一張聖誕咭，將我哋班D同學都話係孤兒，仲講都佢哋好可憐，咁聖誕老人無理由唔寄聖誕咭俾佢哋咁無人情味呀？！」
我問：「咁點解全部地址都唔同嘅？」
阿薄有點輕視嘅目光瞄一瞄我：「你可以話佢哋全部住喺親戚屋企o家嘛，阿醒！」
小闊闊：「又係喎！」
……
雖然阿薄嘅方法係方便快捷，但係事後發覺小闊闊仍然有一大疊聖誕咭無機會用。
P.S.
差D唔記得話比你哋知，我同小闊闊好開心完成咗呢件事，一直想像同學仔收到聖誕咭有幾開心。返到屋企就同Bear姐講。
Bear姐：「 真是好方法，但是你的同學全變了孤兒了。」
我突然好後悔，覺得好內疚。
Bear姐 見我哭了，就說了不少安慰說話，但我仍然覺得我太過份。
晚上抬頭望住房中天花板嘅螢光星星，心想：「我算是做咗件好事嗎？」
聖誕快樂
我係小闊闊。
817 同我講佢覺得話我哋 D 同學係孤兒呃聖誕老人好似唔係幾好。但係我諗嚟諗去都唔知有邊度唔妥。
今天是十二月二十日，我忍唔住又話比我同學 hot dog 知我收到聖誕老人嘅聖誕咭，佢講咗句：「你係唔係傻o架！」就行開 咗。
我無唔開心，因為我知道 hot dog 好快就會知道係真o架。
當我回到家溫習時，收到 hot dog 嘅電話，佢好開心大叫：「真係有聖誕老人o架！」
尾聲
我係阿薄。
一早都話老師講嘢信唔過，今天我喺報紙見到呢段消息：
【明報專訊】「聖誕老人﹕我今年想到迪士尼過生日。」這只是其中一名小朋友，向「聖誕老人」表達的聖誕願望罷了。每年聖誕節，香港郵政的「聖誕老人」都會收到2500封左右來信，寄信者大多為小朋友，小至幼稚園小朋友，大至中學生、大學生及成年朋友，都會來信分享心事，而「聖誕老人」也會回信，送上祝福。
我一定要話俾所有人知，一定要！
……
我係小闊闊呀！
今日收到阿薄嘅電話，佢未出聲，我就急不及待同佢講：「今天已經有很多同學都話收到聖誕老人嘅聖誕咭喇。全靠你啊！雖然係呃咗聖誕老人，但係我哋送咗每位同學一份聖誕祝福喎！」
阿薄欲言又止，臨收線佢講咗句：「平安夜出街嗎？小心過馬路！」
我成日都話阿薄份人其實外冷內熱，佢對人其實幾好，經常會對人千叮萬囑，除咗小心睇車，仲會叫人食飯小心哽親、行雷閃電小心比雷劈……而佢講得最多嘅， 要同學多做善事，小心拉尾嗰廿年！所以佢雖然總係冷冷冰冰，好似全世界都對佢唔住咁。不過佢真 係好好人的，每次屋企煲紅蘿蔔湯，佢都一定分比我，不過佢一定話嗰 D 係飲剩嘅湯同湯渣。
我真係一個幸運嘅人，因為我有一個非常關心我嘅好朋友。
有人說生日時不能說出生日嘅願望，所以我嘅聖誕咭上的禮物願望也沒有告訴任何人。 到聖誕啦！我很期望地把聖誕襪放在門上，因為聖誕老人在聖誕咭中說會送聖誕禮物俾我，不知會不會是我要求的的家族故事書「樣衰阿闊」呢？ 因為這本書已經斷版很多年了，我找了幾年都找不到。
我一直很捨得去睡，很想見聖誕老人，但最後都睡著了，醒來時看看聖誕襪子.......
真的！真的有聖誕老人的！
