小闊闊與 817
二 《當小闊闊遇上817》
大家好，我叫小闊闊。住在香港彩虹村。
人人都話我個樣同老豆一模一樣，但係老媽子話其實我哋個樣都完全唔同，都唔知點解ｄ人會搞錯！
（其實我哋係兔仔，我應該用「兔兔」同「ｄ兔」。但係Miss Chan Chan話有一種寫作手法叫「擬人化」，我又要學吓用！）（Miss Chan Chan佢姓陳，然後嫁咗嗰個又姓陳，所以叫Miss Chan Chan）
我諗，分得出我老豆家闊闊，我阿叔樣衰阿闊
，同埋我三個人喺相學上嘅分別嘅人，喺呢個世界上，就只有我老媽子多黛一個！
點解老媽子會咁清楚？我諗係同佢曾經對我講嘅說話有關：老媽子話佢以前同我阿叔樣衰阿闊青梅捉馬（按：係竹），如果唔係因為佢喺嗰個咩山卡啦海（按：係青海）同老豆咩蟹后（按：係邂逅），即刻一見發財（按：Ar…我諗係一見鍾情掛？），然後就不顧一切撕定張飛（按：應該係私訂終生呀？）……的話，佢就唔會係我阿媽，會係我阿嬸咁話。
咁我又諗，老媽子點會做到我阿嬸呢？最多咪我阿叔變做我老豆，我老豆變做我大伯啫！又或者我會變成我嘅堂阿哥，或堂細佬？但係我可唔可以係我自己嘅堂阿哥，或堂細佬㗎？
又如果情況係咁，我仲係咪我呢？
呢個問題，我一直都想問吓老媽子。但係老媽子經常望住窗口發呆，偶然佢會同我講一ｄ關於老豆嘅嘢，但大部份時間，佢都係發呆。
不過我都未同老媽子提出我嘅問題，就喺今年復活節（按：２００３年），有一班著白衫嘅幪面超人嚟接咗老媽子走，之後就無返過嚟。
爺爺話，老媽子去咗買汽水，嗰種汽水要去好遠買，嗰種汽水好似叫「沙示」！
人哋話我同老豆似樣，其實我都未見過我老豆。老媽子話喺佢「駝」住我嘅時候，老豆為咗ｄ山區小朋友去咗湖南，之後就唔見咗。有人話喺北京見過佢，所以我襯住暑假問准爺爺之後我就去咗北京想搵老豆……如果好彩，搵埋老媽子，仲可以一家團聚添！
去到北京，有個大叔話我知，上個月佢喺蒙古見到有個同我一模一樣嘅人，仲以為我係佢添！
咦？唔通老豆又去咗蒙古？
橫掂都係，不如去蒙古共和國睇吓啦！
估唔到，喺蒙古，我真係見返老媽子……
